الحمد لله ... بدات ريجيم بجد من حوالي خمس اسابيع تقريبا
انا كنت وصلت ل91 كيلو و كسرت كمان
بس الحمد لله بعد ما سموها طلبت و الحت و شجعت قررت اني ابدأ ريجيم بجد
و فعلا بدات ... اينعم او اسبوع كان عامل زي الحرب بتاعت المستجدين بس الحمد لله عدى على خير
الست الوالدة بقى ربنا يخليهالي يا رب كانت قايمة بالواجب و زيادة ... و علشان انا في الجيش كانت كل ما ارجع في اجازة الاقيها عاملة من خيرات ربنا ... يوم مكرونة بشامل ... يوم محشي و بجميع انواعه كمان ايشي ورق عنب بالليمون و زيت الزتون و ايشي بتنجان و ايشي فلفل و كوسا و بط و شوربة خضار ... يعني باختصار الريجيم كان فعلا حرب نفسية قبل اي حاجة
بس برضه الحمد لله لم استسلم للاغراءات و قاومت و فعلا كنت باستخدم الطبق الصغير بتاع الاكل و معلقة مش بتتملي ابدا و افضل - واخده بالك اني مقلتش بدني :) - كنت بقول بافضل امضغ في المعلقة دي يجي دقيقة و قبل الاكل اضربلي يجي نص لتر او لتر الا ربع ميه ساقعه علشان تسد نفسي ... البيبسي قللت منه جدا انا كنت ممكن اشربلي لتر كل يوم ... دلوقتي الازازة الخمسمية ممكن تقعد معايا باليومين و ممكن افضل يجي اسبوع من غير بيبسي كمان ... الشاي بعد ما كان اربع و خمس معالق سكر بقى نص كوباية او تلات اربعاها و كمان معلقة او معلقة و نص بالكتير ... و على فكرة دلوقتي بقيت استطعمه كمان
الايام اللي كنت بقعد فيها في المطار ... كان اليوم بيعدي و كل اللي باشربه هوا الميه الساقعةو بس طول اليوم ... و في اخر اليوم يدوبك كوباية زبادي 80 جرام بتاعت جهينة و في اول الريجيم كنت باكل خيار طماطم كتير بس الاسبوعين اللي فاتوا بقى الميه و الزبادي بس ... اكل الميز بتاع المطار بعد الريجيم دا نفسي اتسدت منه جدا جدا ... حتى المرة اللي طلبت فيها الغدا ... بعد ما اكلت جالي غمت نفس جامدة جدا و مستريحتش الا لما جبت اللي في بطني كله و اخدت امبول بريمبران النهاردة 23/ 6 وزني النهاردة 81 كيلو تقريبا انا الحمد لله تخلصت من كمية ميه كانت متخزنه في جسمي عن طريق الجري الكام يوم اللي فاتوا دول ... ناوي من بكرة انزل الجيم كل يوم و العب حديد بس حالعب اوزان خفيفة خالص و ان شاء الله حبقى ازود التكرارت بس بعد فترة انا عاوز اشد العضلات بتاعت جسمي مش اكيرها و اضخمها " على الاقل مش دلوقتي " عاوز ارجع تاني لمقاس وسطي القديم انا كنت بالبس بنطلون قماش 32 و الله البنطلون لسه موجود و ناوي ان شاء الله بعد رمضان ارجع استمتع بيه تاني من جديد
مشكلتي دلوقتي في الكرش انا عاوز بجد اخلص منه فيه يجي كيلو و نص كدا عاوزين ينزلوا بس انا عارف ان دا حيبقى صعب بس ان شاء الله حيحصل بالارداة باحلم اني اقف جنب سموها في يوم و تبقى مبسوطة ان جسمي متظبط ... اينعم دا مش باينله انه حيحصل قريب بس اهو يمكن محدش يعرف الغيب و لا ربنا كاتب لنا ايه ؟؟؟ و انا دايما بقول يا رب
اه صحيح لما استلم البدلة الصيفي ان شاء الله عاوزها تبقى مرسومة على شان لما اروح امتحانات سبتمبر و اكتوبر اكون " مز " - انا عارف اني اساسا مز بطبعي بس اقصد اكون مز اكتر ^_^ -
ان شاء الله على دخلو رمضان حاكون وصلت ال75 كيلو و يبقى كل اللي فاضللي انزله في رمضان 3 كيلو بس
رمضان ان شاء الله و ادانا العمر حيخلص على 9 او 10 اغسطس 2013 و دا حيبقى توقيت كويس بالنسبة ليا جدا
في الاخر حقول يا رب
المشاركات
ليست هناك تعليقات:
إرسال تعليق