انتهت و لله الحمد امتحانات الباطنة يوم الثلاثاء الماضي انتهت في تمام الثانية عشر إلا ربع ظهرا ... عندما سلمت ورقة صغيرة دونت عليها أسماء الشرائح التي عرضت علينا خلال الشيفت ... نهاية غير متوقعة تماما لوحش و كابوس فظيع لأي طالب طب يسمى الباطنة ... حالة من الذهول ... لا بل الأذبهلال - إن صح التعبير - ... وقفت بلا رد فعل لما يقرب من 15 ثانية " كدا انتهت الباطنة " لا لا مستحيل ... مش ممكن
لم أفق إلا على صوت الدكتور و هي تقول : يللا اتفضلوا اطلعوا علشان زمايلكوا يدخلوا ... !!! لا مستحيل المفروض الباطنة تنتهي بطريقة غير دي ... أي طريقة غير دي ... فين الدم ... في الصريخ ... فين قطع غيار البني آدمين المتطايرة في الأنحاء ... سكون غير عادي أحسست به بعد انتهاء الامتحان ... أمال كانوا بيخوفونا منه ليه بقى ... مهي طلعت سهلة أهيه و أنا طلعت حتة واحدة من الامتحان ... أمال في إيه بقى ..؟؟؟
مش عارف ... المهم أنه و في يوم الثلاثاء 27\10\2009 انتهت امتحانات الباطنة رسميا عندي - و ربنا يستر و مش ندخلها تاني P: -
انتهت ان شاء الله بلا رجعة ... الحمد لله ... نبدأ بقى نركز علشان نذاكر الجراحة يا جماعة ... أيون الجراحة همتكوا معايا ... أنا اذاكر و انتوا ادعولي انجح يا رب ... يا رب تنجح يا تتح ... تتح مين يا عم انت ... يا رب تنجح يا أحمد ... :)
رسغ إيدي اليمين رجع يوجعني تاني ... مش عارف إيه قصته دا ... ربنا يستر ... عاوز اروح اعمل اشعة عليه بعد الامتحانات ان شاء الله ... و كمان خلال الامتحانات بتاعت الباطنة بعد الورقة الاولى على ما اذكر ... جالي حالة arrhythmia او عدم انتظام ضربات القلب بس الحمد لله كانت بمعدل واحد لكل عشرة او تسع دقات ... يعني لسه بدري كدا يا عبد الحكم ... رد عبد الحكم و قال : لسه بدري قوي يا حبيبي ... و علت وجهه ابتسامة باتساع بحر إسكندرية ... :)
صديقي العزيز أ.ح.م.ع. دخل معايا الامتحان السنة دي بس دي تالت مرة ليه للاسف ... بس أنا متفائل خير انه يعدي السنة دي ان شاء الله ايون طبعا ... مش انا معاه لازم يعدي ... طبعا ... :)
الحقيقة الدفعة بتاعت خامسة دي دفعة بجد جدعة ... الناس دي باسم الله ما شاء الله ... معاهم ناس ذات حيثية على راي دكتور خالد هدهود -حاحطلكم صور للدكتور خالد قريب ان شاء الله - و بجد دفعة متعاونة جدا بجد الحمد لله اني دخلت معاهم ... على الاقل افضل من دفعتي الله يسامحهم ... ربنا معانا كلنا ... :)
من ضمن الافكار اللي عاوز انفذها ان شاء الله ان المذاكرة للمعادة البريطانية ان شاء الله حتكون كلها عن طريق الخرائط الذهنية mind maps فكرة جميلة و سهلة ان شاء الله
و دلوقتي كفاية كدا بقى علشان لازم انزل شوية
تحياتي
تحديث : نفس اليوم
كنت استمع لما يقرب من الساعة إلى اغنية أحضان الحبايب لعبد الحليم حافظ ... من الاغاني الحزينة بحق و لكني لاأستطيع مقاومة عدم الاستماع عليها ...
هذا رابط للأغنية على you tube
http://www.youtube.com/watch?v=5hrk8XKIJu8
مرة أخرى
تحياتي
المشاركات
