رامي وفا #دعاء

رامي وفا 

( دعاء المُستضعفين )

يا رب .. 

بلاش تخللي وجعنا .. يوجَع ف ناس تانيين 

و إدِّينا فُرصة نشيل أوجاع حبايبنا 

و ان كان لابُد فراق ... إدِّينا ليه تمرين 

خللينا متسابين .. متخلليناش سِبنا 

جرحنا روحنا امبارح .. بُكره هنجرح مين ؟ 

خلليها روحنا بَردُه .. خللينا على عيبنا 

إن كان شبَعنا يضُر .. جوَّعنا 

إن كات دموعنا مَمَرّ .. إوجَعنا 

إدِّينا صوت يا رب .. 

و بيوت تجمَّعنا 

إدِّينا روح بتحِب .. 

و يكون لها معنى 

إدينا أي إشارة .. 

انك بتِسمَعنا 

بلاش تسيبنا محطَّة يركِنوا فيها .. 

و نصحى ما نلقاش غير ذكرى نبكيها 

بلاش تسيب عيوننا .. محبوس فيها الكلام 

بس أدامهم يا ريت تتحبِس فيها الدموع 

بلاش تسيبنا لحد ما نشحت من بعض اهتمام 

أحسنلِنا بكتير .. نشحَت م العطَش و الجوع 

بلاش تسيبنا فيران تجارِبهم .. 

قادر تحاربهم .. 

و تغلبهُم .. 

و تنصُرنا على كسورنا 

و نضربهُم .. 

و نِكسَبهُم .. 

بس بدون ما نخسَرنا 

ورِّينا فين السِكة .. 

لم تقوَ أبصارنا 

وجِّهنا .. 

إحمينا شَر الكِتابة ( الفِكرة .. و المِهنة ) 

إحمينا من يأسِنا .. من نفسِنا .. من بَعض 

إحنا العباد الغلابة .. 

المُستضعفين في الأرض