أنا فاضل لسة معايا
كام "أول مرة " ف جيبي ؟؟
كام عود كبريت ف العلبة
مرضيش يولع ع الفاضي ؟
كام عود ملهوش ولا سابقة
ف الحرق إلا المرادي ؟
أول مره ادخل سيما
مع بنت... كانت ف اعدادي
كان كده للموضوع قيمة
وبعديها خلاص.. بقى عادي
أنا اسف جداً جداً
علي أول مرة اتحرقت
ع الفاضي ومش وياكي
و أبوسك أول بوسة
تتباس أصلاً ف حياتي
و اتأسف بعدك تاني
علي أول مرة معاكي
و اتأسف تاني وتالت
علي كل كلام اتقال
و أحرق ف حاجات اتقالت
كانت لازم تتشال
لبتوع الدور الجاي
و الجاي أبقى من الفايت
و ميت بيسلم حي
والميت وإن كان تافه
ف بيفضل ملهوش زي
ف انا حفضل فاكر ميّ
و أول ايد بنت امسكها
و أول شوكلاتة هدية
و أول توصيل للبيت
و لحد مافجأه لقيت
مش باقي معايا ف جيبي
غير كام" أول" يتعاش
لا أعرف إن كنت حشيلهم
ولا حبيعهم ببلاش
متشكر جداً جداً
على وقتك تاني يا دكتور
العفو يا سيدي …اتفضل
و اديتني روشتتي تاني
مشطوب منها اربع تسطر
-مش حاسس إنك أحسن ؟
من اخر مرة تجيلي ؟
-مش حاسس أصلا حاجة
و علي إيدك يعني أديلي
ساعتين عمال أتكلم
و مش فاكر نص كلامنا
-السبت الجاي معادنا؟
لأ دنتا الحد ... نسيت
خد بالك بقى من نفسك
وفيه دوا حنكرره تاني
-أنا أصلا حبقى كويس
و مفيش حاجة مضايقاني
و اخدت الباب ف اديا
وما صدّقت إني مشيت
...
كان فاضل لسة سيجارة
ف العلبة لقيتها معايا
بس استخسرت أشربها
قبل أما أوصل للبيت
المشاركات
ليست هناك تعليقات:
إرسال تعليق