سيرة الأراجوز
جيبت ليه صاحب وحبيته
زقنى فى المترو زقيته
واما مات فيا ومت انا فيه
روحتله بيته وعزيته
**
حزن يا بقال ورا الجامع هات بنص ريال عسل فى الكوز
دة اللى كان عيل بقى شاعر واللى كان ضاحك بقى أراجوز
**
حبنى الشارع وحبيته
عض قلبى الليل وعضيته
خضنى الأنسان وخضيته
لما بان من وشه عفاريته
**
عدى فيا القمح سمرنى
عدى فيا الفجر صبرنى
عدى فيا الحزن غيرنى
عدى فيا العمر كبرنى
**
خدنى م اللفة لمريلتى
خدنى م التسنين لحصلتى
خدنى من مدرستى ع الجامعة
خدنى م الترعة على الاسفلت
**
خدت م الاتوبيس مراياته
خدت م السواق حكاياته
خدت م الركاب تذاكر موت
**
حزن يا بقال ورا الجامع هات بنص ريال عسل فى الكوز
دة اللى كان عيل بقى شاعر واللى كان ضاحك بقى أراجوز
**
ياللى وحشانى متوحشنيش
ضحكك السكر محلانيش
خوفت م المطرة قفلت الشيش
ليه فضل اسمك على الشباك
**
كنت جايب دبلة وغويشة
كنت شارب خمرة مغشوشة
شفت شبهك قاعدة فى الكوشة
**
قلت هى لا مش هى
فتشتنى المعة عن ميا
كنت أنشف من حطب محروق
**
حزن يا محول خطوط سيرى
حزن يا عطار فى باب اللوق
شوفلى تحويجة لتفسيرى
حط ريحة بن لضميرى
شوفلى عود أصلب من المغشوش
**
حزن يا بقال ورا الجامع هات بنص ريال عسل فى الكوز
دة اللى كان عيل بقى شاعر واللى كان ضاحك بقى أراجوز
**
ردنى عالباب عطب روحى
جابلى ناى وزتونة مطروحى
**
جيبت ليه صاحب وحبيته
زقنى فى المنترو زقيته
واما مات فيا ومت انا فيه
روحتله بيته وعزيته
**
ردنى عالباب عطب روحى
جابلى ناى وزتونة مطروحى
**
مر انا يا صاحبى لو دوقتنى
جيت اقول الأه ما صدقتنى
يطرح ايه الملح غير مالح
يطلع ايه م الجرح غير مجروح
**
ليه ما تصفاشى لغير صافى
ليه فى عز الحوجة بتجافى
شوفتنى غاطس ولا طافى
كنت بندهلك حلاوة روح
**
حزن يا بقال ورا الجامع هات بنص ريال عسل فى الكوز
**
خد سنين الجرى وسنينى
هاتلى سن غزال دهب عينى
قطع الاسفلت شرايينى
هات بياض القطن شاش اللوز
**
حزن يا بقال ورا الجامع هات بنص ريال عسل فى الكوز
دة اللى كان عيل بقى شاعر واللى كان ضاحك بقى أراجوز
كلمات : خالد عبد القادر
غناء فريق : عمدان النور
دوروا عليها على اليوتيوب بقى :d
المشاركات
ليست هناك تعليقات:
إرسال تعليق