الكلام اللي مش بيتقال.. و الناس اللي بيبصوا علينا من بعيد.. و الرسايل اللي مش بتتبعت.. و الصدف اللي مابتحصلش.. و ضحكتهم في الصور اللي بتفضلوا بصينلها كتير اوي.. و " ياا رب.. " اللي بنقولها من قلبنا اوي.. و الطرق اللي حفظتنا و احنا لسة ماحفظنهاش.. و الناس اللي مستنية مننا كلمة حلوة.. و اللي صابرين علينا و بيداروا.. و اللي مثلوا انهم بقوا كويسين.. و اللي عاملين نفسهم عايشين حياتهم و هما بيتنفسوا بالعافية.. و الجوابات اللي في الدرج.. الاغاني اللي مظبوطة علينا اوي.. كل الحاجات اللي عزناها و ماعزتناش.. و الحاجات اللي كانت عايزانا و ماشوفنهاش اصلاً.. رنة التليفون اللي بتقبض قلبك و مابتطلعش من اللي انت مستنيه.. خذلان كل مرة.. كل المرات اللي كنا محتاجين الدُنيا تنصفنا و مانصفتناش.. و الايام اللي عيطنا فيها في العلن عشان الزعل كان اكبر اوي من اننا نخبيه.. و كل مرة قلنا " تمام و زي الفُل " و احنا متأكدين ان احنا زي الزفت.. كل الحاجات اللي اتخلينا عنها عشان مامسكتش فينا.. الساعات اللي ضيعناها و احنا بعيد عن بعض.. الناس اللي كان نفسنا نحضنهم و ماقدرناش.. كل الحاجات اللي فجأة اختفت.. كل الكلام الفارغ.. و الادوية اللي ماعرفتش تداوينا.. و الجرح اللي ماخفش من سنين.. الاحتياج لحاجات عمرها ما هاتيجي.. كل الكذب اللي كذبناه على نفسنا و صدقناه.. كل اللي كانوا هنا و مشيوا.. كل البُكا اللي كان نفسه يبقى في حضنهم.. كل مرة كنا فيها لوحدنا من غير سند.. و الحاجات اللي مابنشبعش منها.. كل مرة قلنا فيها هانقدر و ماقدرناش..
أنا ماعرفش الحاجات دي تتصنف ايه.. لكن كل اللي اعرفه أن كل ده جوا كل حد فينا.
و حاجات تانية كتيير و ساكتييين
المشاركات
ليست هناك تعليقات:
إرسال تعليق